|
Wara daqsxejn ta’ nuqqas f’aġġornamenti regolari fuq dan is-sit uffiċċjali tas-Soċjetà, illum erġajna qegħdin hawn b’din il-kontribuzzjoni biex ninfurmawkom ftit b’dak li għadda mingħalina u dak li għandna ppjanat fil-futur. Fil-fatt, dawn il-ġranet li fihom dan is-sit kien fuq pawsa, kienu ġranet ferm impennjattivi għall-amministrazzjoni ċentrali tas-Soċjetà kif se naraw.
Mill-aħħar aġġornamenti ‘l hawn, kellna l-ħbieb tagħna tas-sotto-kumitat tal-Vampa Organisations li organizzaw ikla fil-Każin tal-Banda Leone; ikla li minbarra li kienet ferm ippopolata, ġabret lill-voluntiera u attivisti ta’ din il-fergħa tas-Soċjetà fil-każin tagħna għal mument rilassanti servut bi ftit ikel mill-itjeb ippreparat mill-istess membri, taħt il-kordinazzjoni ta’ Joe Zammit. Il-moral kien wieħed għoli ferm. Is-sotto kumitat li għadu kif inħatar għal din il-fergħa diġà ltaqa’ mal-kumitat eżekuttiv u flimkien ma’ l-andament ta’ din l-attività ta’ ġbir ta’ fondi, iddiskuta materji oħra ta’ mportanza sinifikanti, fosthom ovvjament il-festa ta’ Santa Marija 2009.
Barra minn hekk, nhar is-Sibt 8 ta’ Novembru kellna l-kunċert sinfoniku Puccini 150 – Anniversary Concert imtella’ mill-Fundazzjoni Classique. Dawk kollha li jew kienu preżenti jew kienu fil-viċinanzi tal-każin u t-teatru tagħna jafu x’serata impekkabbli kienet. Kienet attività fejn il-fundazzjoni bil-kollaborazzjoni sħiħa tat-Teatru ta’ l-Opra Aurora, imliet għal darba oħra, din l-ikbar sala teatrali fil-gżejjer Maltin. Fil-fatt, is-sala kienet fully booked lejlet l-attività b’ħafna nies joħorġu diżappuntati fil-ġurnata tas-Sibt għaliex ma sabux wisa’. Il-kritika għal dan il-kunċert kienet waħda ferm sabiħa. Prosit kbira tmur hawnhekk lis-surmast direttur, u direttur artistiku tal-fundazzjoni Classique, Mro Joseph Debrincat, li huwa l-Assistent Surmast tal-Banda Leone. Huwa dderieġa l-Orkestra Filarmonika Nazzjonali flimkien mat-Tenur Ignacio Encinas u s-Sopran Maria Pia Ionata li t-tnejn li huma kienu tant formidabbli fl-esekuzzjoni tagħhom. Għal din l-attività, bħal kull attività oħra, it-Teatru ta’ l-Opra Aurora, u s-Soċjetà Filarmonika Leone kienu ferm involuti fil-loġistika u l-organizzazzjoni fejn servew ta’ spalla lill-fundazzjoni organizzattiva bil-provediment ta’ servizzi u riżorsi umani. Pero’, f’dan il-każ, aktar minn kull każ ieħor, ma setax ikun mod ieħor, hekk kif is-Soċjetà, bl-ikbar unur u kburija kienet qiegħda tgħin u tassisti lill-bniedem minn tagħha li bil-għaqal u l-ħila tiegħu qiegħed kull ma jmur ikompli jibni r-reputazzjoni u l-karriera tiegħu. Għalhekk prosit u grazzi mill-ġdid. Puccini 150 – Anniversary Concert apparti mis-suċċessun li ssarraf minn ħafna xogħol, dedikazzjoni u maestrija fil-qasam mużikali u artistiku, kien ukoll ta’ żewġ eżempji ħajjin; l-ewwelnett, il-kollaborazzjoni bejn inizjattivi indipendenti u s-Soċjetà Filarmonika Leone li jistgħu jissarrfu f’affarijiet kbar u sbieħ, u t-tieni, il-benefiċċju li s-Soċjetà Leone bħala skola mużikali u kulturali toffri lil uliedna.
La qed insemmu lil uliedna, komplew ukoll l-inizjattivi tal-ħarġiet kulturali u rikreattivi għall-alljievi tal-banda u l-ħbieb tfal u adoloxxenti, organizzati mill-Aurora Youth Movement. Wara waqfa fil-perjodu ta’ l-opra lirika, komplew il-ħarġiet. Kellna żewġ mixjiet oħra, waħda lejn il-Wied tal-Lunzjata u Santa Luċija u l-oħra fl-inħawi ta’ San Dimitri fejn il-grupp, li n-numru tiegħu reġà kiber drastikament, mexa mill-periferija ta’ l-Għarb, sal-Kappella ta’ San Dimitri, lejn l-irdumijiet, sa Wied il-Mielaħ u lura. Tassew xeni mill-isbaħ, li huma ferm rari u diffiċli biex wieħed imur igawdihom fuq inizjattiva personali u individwali. Kien evidenti li dawk kollha preżenti ddevertew u rrilassaw minkejja l-mixja twila u dan ikompli jawgura tajjeb għaż-żminijiet li ġejjin.
Is-Soċjetà Filarmonika Leone issa tkompli taħdem fuq aktar inizjattivi ġodda biex inkomplu nsebbħu l-kalednarju kulturali u soċjali tagħna, li għalina huwa l-pulmun tan-nifs tagħna. Is-Soċjetà Leone, bħala soċjetà mużikali tibqa’ tgħix u tieħu nifs, kemm iddum torganizza l-attivitajiet kulturali u mużikali. U fil-futur qarib inkunu nistgħu wkoll inħabbru aktar inizjattivi u proġetti ġodda, hekk kif jiġu kkonfermati mill-kumitat ċentrali.
Sadanittant, tkompli l-ħidma strutturali fil-każin flimkien mat-tkomplija tal-proġetti tal-manutenzjoni. Fil-ġimgħat li ġejjin, eventwalment inkunu nistgħu anki nurukom xi ritratti ta’ xogħolijiet oħra li qegħdin iżommu lid-direttorat tal-każin impennjati, hekk kif issa wkoll fil-ġranet mhux imbiegħda jibda t-tiżjin tal-Milied li jdaħħluna fi staġun impennjattiv ieħor. Għalhekk żommu rwieħkom aġġornati ma’ dan is-sit, li issa jerġa’ magħkom b’mod aktar frekwenti u regolari.
|
